अल्प भुधारक शेतकरी बनला १५ एकर शेतीचा मालक

चामोर्शी तालुक्यातील तांबाशी येथील अल्पभुधारक शेतकरी गणपती सातपुते यांने शुन्यातुन विश्व निर्माण करीत मेहनतीच्या जोरावर पडिक जमिनीवर उत्पादन घेऊन आर्थिक प्रगती साधली . भुमिहीन गणपती सातपुते आज १५ एकर शेतीचा मालक बनला आहे. 

शेती परवडत नाही असे म्हणत कित्येंकांनी शेती करणे सोडून दिले आहे. मुळचा अल्पभुधारक असलेला गणपती सुरवातीला दुस-यांच्या शेतात मजुर म्हणून राबायचा. मजुरीवर गणपतीचे कुटुंब चालत होते. मजुरीच्या जोरावर प्रगती साधली जाणार नाही हे लक्षात येताच गणपतीने दुस-यांची शेती ठेका पध्दतीने करण्यास सुरुवात केली. अथक परिश्रमातुन नवनवीन तंत्रज्ञानाचा अवलंब करुन गणपतीने उत्पादन वाढविण्याचा प्रयत्न केला. सुरवातीला गणपती सातपुतेला अनेक अडचणीचा सामना करावा लागला. इतरांची शेती ठेक्याने घ्यायची म्हणजे पदरी पैसा असावा लागतो. मात्र मजुरीच्या भरवश्यावर कुटुंबाची गाडी चालवायची की शेती करायची असा प्रश्न गणपतीला पडला. परंतु गणपतीला आपल्या मेहनीवर पुर्ण विश्वास होता. 

गणपतीने शाळेत प्रवेश केला मात्र पहिल्याच वर्गात त्याने रामराम ठोकला. वयाच्या आठव्या वर्षी जमिनदाराची चाकरी पत्करली. संयुक्त कुटुंबात खाण्याची चणचण सर्वाना मजुरी करणे आवश्यक होते. त्यामुळै गणपतीने शिक्षणाचा नाद सोडून दिला. गणपतीच्या हिश्याला वडीलोपार्जीत नाममात्र एक एकर शेती आली. 


एक एकर शेतीच्या जोरावर गणपती सातपुते यांनी कृषी विभागाच्य मदतीने फळबागाची शेती करण्याचा निर्णय घेतला. मेहनत व कृषी विभागाच्या साथीने गणपती सातपुते यांनी शेतीतून भरघोस उत्पन्न घेतले तीन वर्षातच सातपुते यांनी १० एकर शेती खरेदी केली. वैनगंगा कृष्णा ग्रामीण बॅकेच्या अर्थसाहाय्याने पिक कर्ज घेऊन शेतीसाठी सिंचनाची सोय झाल्याने सातपुते यांनी शेतीत विविध उत्पादन घेण्यास सुरुवात केली. हळुहळु प्रगतशिल शेतकरी म्हणून गणपती सातपुते तालुक्यात नावारुपास आले. कृषी विभागाच्या वतीने सातपुते यांची आदर्श शेतकरी म्हणून निवड करण्यात आली. 

२००६ मध्ये राज्यपाल एस. एम. कृष्णा यांच्या हस्ते सातपुते यांचा गौरव करण्यात आला. सातपुते यांचा आदर्श डोळयासमोर ठेऊन इतरांनी त्याच्यापासून प्रेरणा घेण्याची आवश्यकता आहे.